Telugu Bloggers

ఫలార్హత

విత్తనం నేలలో నాటగానే
బాధ్యత తీరిపోయినట్లుగాదు
బీజాన్ని పాతిపెట్టిన్నాటినుంచి
ఫలసాయానికి అర్రులు సాచడం
రాట్నానికి ఏకు ఎక్కించకుండా
గాల్లోంచి నూలు తీయబూనడం

గింజ నాటే ముందుగానే
భూమిని మొలకకు సిద్ధం చేయాలి
మొక్కకు అనువుగా పాదుచేయాలి
సారవంతమైన మట్టిని ప్రోదిచేయాలి
నీటితో నేలను పదును చేయాలి
భూసారాన్ని పెంచడానికి
అవసరమైతే ఎరువు వేయాలి..
శివుడికి అభిషేకం చేసినట్లు
గింజను జలసేచనంతో చల్లబరచాలి

తననుతాను రెండు చెక్కలుగా విస్ఫోటించుకొని
మొక్కగా రూపొండి, గింజ
తూర్పుకొండనుండి తొంగిచూచే
తొలిపొద్దుపొడుపులా
తలను పైకి నిక్కిస్తుంది..

ఆహ్వానించని అతిధిలా భావించి
పశువులు దాన్ని మట్టుపెట్టకుండా
కంచెకవచాన్ని తొడగాలి
రక్షణగా నిలవాలి.
మొక్క వృక్షమయ్యేంతవరకూ
మెలకువతో కాపాదాలి..

తనకు చేసే శుశ్రూషలకు
తృప్తిచెందిన చెట్టు
పెరిగి పెద్దదై కృతజ్ఞతతో
ఫలసాయాన్ని పంచి పెడుతుంది..

నిరంతరకృషి మాత్రమే
ఫలనుభవానికి
అర్హత చేకూరుస్తుంది